HAMUNAPTRA - MJI ULIOPOTEA (8)

“Amatagaimba! Wanatufuata….” Seidon alipiga kelele huku akiwa katika kasi ya ajabu.

“Usijali Seidon, piga mbioooo,” Amata alijibu, akainua mkono wake na kuibusu pete yake, “Shusha dhoruba ya jangwani ee pete ya ajabu,” Amata alisema maneno hayo huku pete ile ikiwaq jirani kabisa na kinywa chake. Mara radi moja kali ilipiga na mchanga uliochanganyika na vumbi ulitimka nyuma yao na kuwatenganisha kati yao. Seidon na Amata walisimama mbele na kugeuka nyuma ambako walishuhudia vumbi zito likiwazuia adui zao wasiweze kuwafikia.

Amata ga Imba na Seidon, wakagonganisha viganja vyao na kupeana ishara ya mafanikio, kisha wakaendelea na safari kuelekea mji wa Hamunaptra, tayari kwa kazi ya kurudisha fuvu lile la Cleopas.

“Seidon,” Amata amuita swahiba wake, “Sasa tunakabili mji wa Kush, hauna tabu kuuvuka, lakini sharti lake hutakiwi kuongea na mtu yeyote, na mji ule ni vizuri kuuvuka majira ya saa tano wakati jua linapokuwa linauendea utosi, lakini kuna kijiji kidogo ambacho lazima tukipite kijiji hiki ni jicho kubwa la malkia wa Soari, Sharhazad, pale patakuwa na ugumu wa kupita kwa vyovyote vile, kwa hiyo tujiimarishe kiroho na kiakili,” Amata alimaliza risala yake na kumuacha Seidon akiwa midomo wazi kwani yote haya hakuwa akiyaelewa tangu awali. Waliendelea mwendo mrefu kidogo na kufika sehemu moja tulivu yenye dimbwi la maji safi, dimbwi lililozungukwa na mitende na maua mazuri.

“Tupumzike hapa Amata, nimechoka sana,” Seidon aliomba, Amata alisimama na kumtazama Seidon ambaye tayari alikuwa amekwishaikanyaga ardhi na kuyakimbilia maji yale.

“Seidon!” Amata aliita, Seidon akageuka, “Subiri kwanza, unajua tupo wapi?” Amata aliuliza, “Jangwani, kwani vipi?” Seidon alijibu na kutupa swali, “Sasa wewe umeshawahi kuona jangwani kuna maji? Seidon hayo si maji,” Amata alimwambia Seidon huku akimvuta kumrudisha nyuma.

Seidon hakulipinga hilo, alirudi nyuma na molja kwa moja akapanda farasi wake, akamtazama Amata, Amata alikuwa akiyaangali yale maji kwa makini sana.

“Huo ni mji wa watu, tusiwaamshe twende tuendelee mbele,” baada ya kusema hayo Amata na Seidon waliendelea mbele zaidi na zaidi, wakipanda vilima na milima ya jangwani. Jua la asubuhi lilianza kuchomoza upande wa Mashariki na kuanza kuliangaza anga lote, Amata alimuongoza Seidon mpaka kwenye mji Fulani ulioonekana kukaliwa na watu wachache sana, wake kwa waume, hapakuonekana mtoto, waliusogelea mji huo na walipoufikia walipokelewa na wasichana warembo. Seidon aliwatazama wasichana hawa, walikuwa warembo wa kuvutia, kisura hata kiumbo.

“Usiogope Seidon, hapa ni mahali salama sana, kula, kunywa, lakini usilale na mwanamke, ukifanya hivyo utakuwa umeharibu kila kitu,” Amata alimwambia Seidoni wakati akiingia ndani ya nyumba moja iliyoonekana kupambwa na maua mengi mazuri lakini bado ilhali iko jangwani.

Ndani kulikaa mzee mmoja wa makamo aliyevalia vazi la ngozi ya ngamia, na kichwani mwake akiwa na kofia ya manyoya ya mbuni.

“Unakaribishwa sana ewe shujaa wa msitu,” Yule mzee alitamka maneno hayo huku akiinamisha kichwa chake.

“Nimekaribia, ee mfalme wa Kushi, nimekuja kwako mimi na mwenzangu, tunapita njia tunaenda huko waliko wafu, utujalie yale tunayohitaji pamoja na mema yako,” Amata akasema hayo huku akiinamisha kichwa chake kwa namna ile ile aliyofanya Yule mzee pale mwanzo.

“Shaka ondoa, siku zote, mwema hupata mema na mbaya hubaki na mabaya yake, kwa nini nikupe dhoruba ilhali shwari ninayo? Seidon kitukuu cha Vernad, mwana wa Velvesh, bahati yako sana hukumrudia Sherhazad, lakini roho ya babu yako Vernad iko ndani yako, usimuache huyu shujaa wa Msitu hata utakapotimiza lile ulilotumwa,” Yule mzee aliongea kwa utulivu sana, Seidon alishangaa kukuta Yule mzee akilijua jina lake vyema, kalijuaje yeye hakuwa na jibu. Amata ga Imba na Seidon, walikaribishwa kwenye zuria safi la ngozi ya ngamia, kisha wasichana warembo waliingia na kuwapa huduma zote wazitakazo, huku Seidon akipewa matibabu ya jeraha lake huku akikandwakandwa viungo vyake.

Amata ga Imba na mwenzake Seidon walipewa ukarimu wa hali ya juu sana, huduma zote alizostahili kupata mwana wa Suiltan basi wao waliziopata pia. Seidon alihisi nguvu zimemrudia na mwili wote ulikuwa umekuwa katika hali yake ya kawaida.

“Unajisikiaje sasa?” mwanadada\mrembo aliyepiga magoti mbele ya Seidon alimtupia swali lile, Seidon alijikuta anashindwa kujibu, alibabaika kwa swali hilo hasa alipomwangalia msichana yule mbichi ambaye alivaa nguo ndefu lakini iliyoanzia kiunoni kurudi chini huku juu alibaki hivohivo, chuchu zilizochongoka na kusimama zilimfanya Seidon apagawe, midomo ilimchezacheza, kabla hajasema kitu alikabidhiwa ua zuri la manukato safi, akalipokea na kulinusa, ua la yugiyugi, Seidon akaongea maneno yasiyoeleweka katika lugha ya kwao na lile ua likachanua mkononi mwake, akatikisa kichwa kuashiria kuwa kuna kitu amegundua. Katika mila za Wavelvesh, ua la yugiyugi lilimaanisha bahati, hivyo msichana huyu kumletea ua hilo Seidon ilikuwa ni kama bahati.

“Unaitwa nani?” Seidon akamuuliza

“Teboria,” akajibiwa.

“Teboria, Teboria, Teboria!” Seidon alirudia kutamka jina hilo kwa mara kada kwa sauti ya chini, alihisi ameshawahi kulisikia sehemu lakini hakumbuki ni wapi.

Teboria akaketi jirani na Seidon, Seidon akahisi harufu nzuri ya manukato kutoka kwa binti yule, akasogeza kinywa chake jirani na yule binti, yule binti naye akafanya hivyo, ndimi zo zikapishana kwa ufundi mkubwa sana, Seidon alihisi raha ya ajabu ambayo hakuwahi kuipata katika maisha yake, sauti za mahaba zikaanza kukijaza chumba kile. Seidon akachanganyikiwa, akaweka upanga wake pembeni na kutaka kumsaula yule binti, yule binti akajitoa kifuani mwa Seidon, Seidon alipomtazama usoni hakuwa Teboria, balisura ya msichana mwingine kabisa ambayo pia haikuwa ngeni usoni mwake.

“Ni nani wewe?” Seidon alimuuliza yule msichana huku akiwa kajirushia upande wa pili wa kichumba hicho.

“Ulinikimbia ee? Sasa nimekupata tena, na sintokuacha mpaka uitimize ile ahadi yangu, mimi ni Sherhazad, Malkia wa Soria, nimekuona tangu ukiwa Hamsud na nikafurahi kwa kuwa ulifanikiwa kuchukua lile fuvu, haya nikabidhi au la naitoa roho yako na fuvu nalichukua,” Sherhazad, sasa alichukua sura na umbo lake la kawaida. Chumba kikajaa manukato maradufu, Seidon akabaki anatetemeka mkononi akiwa ameshika ule mfuko mweusi ambao ndani yake kulikuwa na lile fuvu. Sherhazad alimfuata huku mikono yake ikiota kucha ndefu kupita kawaida, ilikuwa ni hali ya kuogofya, ulimi wake uligawanyika mara mbili, mara kichwa chake kikageuka na kuwa cha nyoka, Seidon alisimama na kuutwaa upanga wake, sasa Sherhazad akawa nyoka kamili, nyoka mkubwa, tuseme joka. Lile joka likaruka kumfata seidon pale aliposimama, Seidon akaepa na kuvurumisha ule upanga lakini akalikosa. Kishindo kile kikubwa cha lile joka kuangukia chini kiliwashtua wengi.

Amata ga Imba akiwa amejilaza chini ya mtende, alisikia kishindo hicho na mara akasimama na kukimbilia kwenye kile kinyumba alimokuwa Seidon, alipofika hakuamini macho yake, Seidon alikuwa amevirigwa na lile joka, Amata ga Imba akaufuta upanga wake na kukata sehemu ya mkia wa lile joka, mara akasikia sauti ya mwanamke ikicheka kwa kebehi, Amata ga Imba alitazama huku na kule hakuona kitu wala mtu ila sauti hiyo iliendelea kumcheka kwa kebehi. Amata ga Imba akatulia pale alipo huku upanga wake ukiwa juu hewani ameushika mpini kwa mikono yake miwili, alipoushusha alikata katikati mwa lile joka, lile joka likapiga ukelele wa ajabu na kumuachia Seidon, kisha likajizungusha pale chini na badala yake akasimama msichana mrembo, Teboria.

“Amatagaimba, majini haya, tuondoke,” Seidon, alikurupuka na kutoka nje, Amata akamfuata, Seidona alikuwa tayari juu ya farasi wake, “Seidon,” Amata aliita na kumuamuru ateremke kwenye farasi.

“Nilikwambia nini Seidon?” Amata ga Imba alimuuliza kwa ukali, “Nilikwambia nini?” aliuliza kwa kelele, “Sikiliza Seidon nilishakwambia epukana sana na wanawake, hawa wataharibu mpango mzima, sio binadamu wale ni majini, sasa usirudie tena, Sherhazad keshajua unakoelekea na ameshakuona ukiwa na hilo fuvu sasa kazi ni nzito kufika Hamunaptra, na hii ni kwa sababu tu umekiuka masharti. Wewe mwenyewe ulinambia kuwa babu yako amekuonya hivyo hivyo juu ya wanawake, sasa kwa nini utaki kusikia? Kuwa mwangalifu,” alimaliza Amata ga Imba kisha akarudi na Seidon mpaka pale chini ya mtende.

Wakiwa katika kuketi pale mara akaja mmoja wa masuria wa yule mzee aliyewakaribisha akawapa ishara ya kuwa wamfuate, nao wakafanya hivyo, wakaingia ndani na kuketi mbele yake.

“Sikilizeni vijana, hapa pameshaingia matatizo, inabidi muondoke mara moja, tayari pepo zinataka hilo fuvu kwa nguvu zote, pepo la Soria, mwanamke hatari tayari limeshakuja hapa kwa nguvu zote kabisa. Naomba watu wangu wasidhurike, muondoke, muende na safari yenu, lakini kwa kuwasaidi ili mfike salama, sikilizeni, msipande farasi kwani hana uwezo wa kuvumili shida na dhoruba za jangwani, maana sasa mtakatisha jangwa kubwa lenye vikwazo vingi lakini hamna budi kuvuka ili mfike haraka huko muendako na hiyo ndiyo njia fupi, piteni katikati, usiku, miifuata nyota ya kilimia itawaongoza mpaka katika bonde la Sham, ambapo amtalivuka na kutokea karibu na mto Frati kutoka hapo nafikiri mnaijua njia,” yule mzee mwnyeji wao aliwaekeza na kisha kuwapatia ngamia, masurufu ya njiani na kuwaruhusu waende zao, mara tu Maghalibi ikifika ili waondoa nuksi katika kijiji chao.

Safari ilianza jioni hiyo, Amata ga Imba akiwa mbele na Seidon akiwa nyuma yake, walilikata jangwa kwa taabu ya upepo na ghasia za vumbi lakini walivumilia ili lengo lao lipate kutimia. Usiku wa manane walijikuta wamefika mbali sana na mbele yao palionekana kitu kama korongo kubwa sana, mbala mwezi ilikuwa ikiwaongoza kwa mwanga wake mwanana, wakasimama kwa muda na kutazama mandari ile yakutisha kama si ya kuvutia, ‘Bonde la mauti’ Amata ga Imba alihisi sauti ikimnong’oneza, akageuka nyuma asione mtu, akaendelea kutazama kutazama lile korongo kubwa sana, kitu kama moshi kilikuwa kikifuka na kulijaza lile korongo, waliweza kuona vitu kama mawe si mawe ilimradi tu vilikuwepo vipo. “Seidon, hapa kuna kazi,” Amata ga Imba alimwambia Seidon, akageuka kumtazama akamuona ametulia kimya kama mtu anayetafakari kitu fulani. “Seidon, unawaza nini?” akamuuliza.