DHAMANA (25)

Nakumbuka vizuri kijijini kwetu waliingia wageni ambao walipatiwa eneo ambalo baadaye walilinunua wakajenga makazi yao ya kudumu, wageni hao walikuwa ni wenye asili ya tofauti na watu walioko kijijini kwetu kwani wao walikuwa na asili ya uarabu lakini siyo wang'avu kabisa na ninaweza kuwaita wasomali pia. Walikuwa ni mke na mume pamoja na kijana wao mmoja ambaye ni makamo yetu, wageni wenyewe walioingia katika kijiji chetu walikuwa ni Mzee Mubaraka mkewe pamoja na mtoto wao wa pekee Faimu. Kuja kwa huu ugeni ndiyo kikwazo kikuu cha kumpata Farida kilichokuwa kinaniumiza akili, kikwazo hiki sikuweza kukibaini hapo awali kwani Faimu hakuonekana kama atakuja kuwa kikwazo katika kumpata Farida.

Ndani ya mwezi mmoja wa kwanza tangu Faimu awasili pale kijijini kweti tayari wavulana wa rika letu walishaanza kumchukia kwani alikuwa kikwazo kwao kikubwa cha kuwapata wasichana hao, uzuri wa sura, umbo na hata muonekano mwingine alionao Faimu ulifanya awe midomoni mwa wasichana wa karibia kijiji kizima na kila msichana alikuwa na ndoto za kuwa na uhusiano wa kimapenzi na Faimu na kupelekea kuwa na ushindani mkubwa katika kumpata.

Mabinti hawa walibuni mbinu mbadala ya kufanya waweze kuwa chaguo la wazazi wa Faimu kwani kipindi hicho mzazi akimpenda binti basi hufanya mipango ili aweze kuwa mkwewe, sasa basi ili waweze kuwavutia wazazi wa Faimu walikuwa wakienda mara kwa mara nyumbani kwa mzee Mubaraka wakitumia njia ya kumsaidia kazi mke wa mzee Mubaraka ili waonekane ni mabinti watiifu. Mbinu hiyo ya mabinti wa kijijini kwetu haikujulikana na mzazi yoyote zaidi ya kuona ni tabia njema tu ya mabinti zao katika kuwakirimu wageni ili tu nao wakipata mabinti waje kuwakirimu, hakika ukarimu ndiyo ulikipamba kijiji chetu na ndiyo maana hila hiyo haikugundulika kwa wazazi zaidi ya kubainika na wavulana tu wa kawaida waliozidisha chuki sana kwa Faimu.

Ulipotimia mwaka mmoja tangu Faimu ahamie hapo tayari alikuwa anachukiwa na robo tatu ya wavulana wa kijiji hicho na marafiki zake wakuu tulikuwa ni mimi na Hamis tu, sisi pekee tulikuwa ni marafiki zake wakubwa kutokana na kuwa mcheshi sana kwetu. Katika kipindi hicho hakuwahi kumtambua Farida kwani tangu ahamie alisikia habari za Farida ila hakupata bahati ya kukutana naye ana kwa ana kutokana na kazi mbalimbali zinazomkabili Farida, hata Farida naye kwa mujibu wa Hamisi alithibitisha kuwa hakuwa kumuona Faimu zaidi ya kusikia kuna mgeni kahamia ana urafiki na sisi.

Kusema uongo dhambi na pia kumsifia uzuri mwanaume mwenzio siyo vizuri ila ukweli Faimu alikuwa mzuri sana hadi akafikia hatua baadhi ya kina mama wa kijijini wakaanza kumtaka huku mabinti wengine walidiriki kupigana kisa yeye tu, ilifika kipindi wasichana uvumilivu ukawashinda wakamuambia ukweli na hadi wengine walitoroka majumbani mwao kipindi cha usiku wakaenda kuvamia chumbani kwake ili walale naye lakini bado alikuwa na msimamo wake kama mtu anayejitambua.

Siku moja tukiwa kwenye kijiwe chetu tukiongea nikiwepo mimi, Hamis na Faimu mcheshi wetu aliyetufanya tucheke kila kukicha. Siku hiyo Farida alipita mbele ya macho yetu na ndiyo hapo nikamuonesha Faimu nikamtambulisha ni shemeji yake ili tu amuheshimu na asije akampenda kwani nilishabaini mwenzangu wasichana kwake ni kama mbwa na yeye ni chatu wanamfuata wenyewe, nilipomuita Farida siku hiyo alikataa kuitika akaendelea kwani alikuwa ametumwa na baba yake.

Niliponyamaziwa mimi niliumia sana na ndipo Hamis akamuita akaitika na akajongea pale tulipo kutokana na heshima aliyokuwa nayo kwake kama kaka yake, Farida alipofika macho yake yalikuwa hayotoki usoni kwa Faimu hadi nikaanza kujisikia wivu ingawa nilijipa moyo baada ya Faimu kumtazama mara moja kisha akainamisha macho yake chini asimtazame tena.

"Farida mdogo wangu heshima wafunzwa nyumbani ila hutaki itumia ukiwa upo nje ya nyumbani, Shafii si akuita mbona wamfanyia hivyo au hapaswi kukuita" Hamis alimuambua Farida ambaye alikuwa ameinamisha macho chini kwa aibu.

"apaswa niita kaka ila ntachelewa, baba kaniagiza kwa mzee Mubaraka nipeleke huu mzigo niwahi rudi" Farida aliongea huku akiangalia chini.

"Si vibaya akikusindikiza basi hebu nenda najua hutochelewa" Hamis alimuambia Farida ambaye alikubali kutokana na heshima aliyokuwa nayo kwa kaka yake, nilimsindikiza Farida huku nikimchombeza kuhusu ombi langu kwake na hata nilipozidi aliiua mada yangu na akawa ananiuliza juu ya Faimu na ikanibidi nimueleze kila kitu na kisha nikaendelea kumchombeza Hadi namsindikiza na kurudi kwa wenzangu sikuwa nimeambulia jibu la kuniridhisha moyo wangu ingawa niliporejea Faimu aliniuliza juu ya Farida niliamua kumdanganya.

"Kila kitu kipo kizuri rafiki na hapa alishindwa itika sababu aona haya yupo kakaye" Nilimdanganya Faimu huku nilichojibiwa kikibaki kuwa siri moyoni mwangu na kwa Hamisi ambaye anajua kila kitu juu ya kukataliwa kwangu.

"Shafii nipe mkono" Faimu aliniambia huku akitabasamu na mimi nilimpatia bila hata hiyana, Faimu alinipa mkono kwa ishara ya kutoleana pongezi halafu akaniambia, "hongera sana Shafii wajua kuchagua haswa rafiki nikupe hongera".

Maneno ya Faimu yalinifanya nitabasamu ingawa moyoni nilijiona ni mjinga kwa kupewa sifa nisizostahiki kupewa na nilipata ahueni sana na nikawa na uhakika Farida ni wangu tu kwani niliyemuhofia hakuonekana kuwa na muda nae hivyo sikuwa na mpinzani kwani kijiji kizima nilishawapa vitisho vijana wenzangu kumfuata Farida nikiwaambia ni mali yangu. Baada ya siku hiyo urafiki wetu ulidumu kama kawaida ingawa ulikuja kuingia dosari miezi mitatu mbele kutokana na taarifa aliyotuletea Salma ambaye alikuwa ni shemeji yangu kwa Hamis, siku hiyo nilijikuta nikipandwa na ghdhabu sana kutokana na taarifa hiyo kwani iliniuma mno tena iliniuma sana.

Salma alituletea taarifa ya kuwaona Faimu na Farida wakifanya jimai katika kichaka kilichopo kando ya mto ambao tunautumia kuchota maji ya matumizi ya nyumbani, Salma alieleza kuwa wote walikiri kuwa wanapendana na ndiyo chaguo la kila mmoja.

Iliniuma, iliniuma tena sana kupata taarifa hiyo kutokana na kumpenda sana Farida aliyekuwa hana upendo na mimi Nilitamani kumfanyia jambo la kwenda kumpiga Faimu na nimuonye juu ya kuachana na Farida lakini Hamisi alinizuia akiniambia sina mahusiano na Farida na ningefanya hivyo na Farida akatangaza ningeumbuka sana. Maneno ya Hamis niliyaafiki na hapo ndipo tukaanza mikakati ya kumfanyia kitu kibaya Faimu, niliwashirikiaha wadogo zangu wote katika mpango huo kasoro Ally ambaye sikumuamini kutokana na urafiki wake na Faimu ambao nilikuwa siuelewi. Hamid ,Haasan, Hussein na Falzal wote walikubali kumfanyia njama Faimu kwani wasichana waliokuwa na mahusiano nao walikuwa wakimpenda Faimu hivyo jambo hilo liliwakera sana, tulianza kusuka mpango wa kumkamata Faimu akipita kuelekea kuchunga mbuzi wa kwao ili tumuue lakini mpango huo ulishindikana kwa namna ambayo haikueleweka.

Mara ya kwanza tulipanga tumuue akiwa machungani akichunga mbuzi lakini tulipoenda tulimkosa kwa siku mbili tofauti ambapo tulimuona ni yeye alikuwa amepeleka mbuzi machungani lakini tulipoenda tulikuta anayechunga mbuzi ni mzee ambaye hatumjui, mpango huo ulishindikana kwa mara nne mfululizo na hata yule mzee tunayemkuta tukimuuliza anasema ameondoka baada ya kuleta mbuzi huku machungani. Muda wa kurudisha mbuzi alikuwa akionekana ni yeye anarudisha hao mbuzi, tulipomfuata kwa urafiki wetu wa kinafiki na kumuuliza juu ya alipokuwa alituambia huwa anatoka kidogo tu akimuachia yule mzee ila anarudi. baadaye.

Mipango ya kumuua ilipokosa mafanikio ndipo tukatumia mbinu nyingine tofauti ya awali ingawa nayo haikufanikiwa, tuliamua kwenda waganga wa kijijini kwetu ili tumuue kwa njia ya uchawi lakini cha ajabu waganga wote walisema hilo suala haliwezekani, mwishowe tukaamua kumuhadaa rafiki wa baba yetu kipenzi mzee Mahmud ili amuue kwani tuliamini yeye ndiyo mganga mwenye nguvu peke yake kijijini kwetu lakini baba yetu naye alikataa katakata akisema siyo kazi yake kufanya ubaya.

"wanangu mnalolitafuta nj kubwa sana tofauti mnavyofikiria, Faimu ni mwenye nyota kali sana hakuna mganga yeyote awezaye kuizima na yasimkute matatizo labda Muumba amnusuru. Pia siui bali naagua" Nayakumbuka maneno ya baba yetu ambaye ni sawa na baba yetu aliyepelekea uzao wetu alivyotuambia

"Kaka twafanyaje sasa maana yule simpendi sana" Hamid aliongea tukiwa tunajadiliana nyumbani kwetu baada ya kutoka tu nyumbani kwako Baba yetu Mzee Mahumd.

"jamani sikilizeni, yabidi twende kwa baba yake Sauti ya radi wa pale Maforoni nafikiri tutaweza" Hussein alitoa wazo ambalo nililiafiki na nilipanga kwenda mwenyewe huko Maforoni, siku iliyofuata asubuhi na mapema nikaenda maforoni kwa kupitia njia ya mkato na nilitumia muda mfupi tu nikawa nimeshafika kutokana na kutumia baiskeli yenye uwezo mzuri. Nilifika nikapokelewa vizuri na yule mganga na nikamueleza tatizo langu lote, mganga huyo aliongea na walimu wake kwa muda mfupi kisha akaniambia "Kijana huyo mpinzani wako ana nyota kali sana na kumuua haiwezekani sema nakupa dawa moja utaenda mchanganyia huyo binti kwenye maji ya kunywa na akinywa yeye atakupenda wewe milele tu, huyo mbaya wako atakuwa hana nafasi tena".

Mganga alinipatia dawa hiyo ya unga na nilirejea kijijini haraka sana nikawaambia ndugu zangu nilipofikia kisha tukamuita Hamis na tukamuambia kila kitu, Hamis akasema tumuachie hiyo kazi ataimaliza na kweli tulimuachia hiyo akaifanya na matokeo yakaja mazuri sana.

Farida alianza kunipenda mimi akawa hamtaki Faimu jambo ambalo lilikuwa ni ajabu kwa Faimu ambaye alizidi kumfuata Farida na hatimaye alitukanwa sana mbele za vijana wengine na kusababisha vijana wazidi kumcheka. Faimu hakukoma alizidi kumfuatilia Farida na majibu yakawa ni yaleyale, na huo ndiyo ukawa mwisho wa penzi lao.

Nakumbuka mara mwisho Faiz alimfuata Farida kisimani akalazimisha penzi na matokeo yake yalikuwa ni mabaya, kwani Farida alipiga kelele za kuwa anabakwa na sisi tuliokuwa karibu tukamvamia na kuanza kumpiga na baadaye watu waliongezeka hasa vijana wanaomchukia ambayo walimpiga sana kisha akapelekwa kwa kiongozi wa kijiji.